الطفل اللذي لا ينام

قعدت من النوم الساعه ست المغرب اول شي اسويه اشيك على الموبايل رساله من أختى الكبيره

تقول فيها انا اليوم مسويتلك عشا لازم تجي؟؟

المشكله اشعر بتعب ومالي خلق ودي اطلع ارفه شوى عن نفسي والمشكله الثانيه مواعد اخواني نروح حق مرشح جديد متفائلين فيه خير مع العلم ان كل المرشحين فى كل الكويت جرابيع متجمعه هذا رايي الشخصي واتمنا ان تحترمونه

(:

لالالا يرابيع علشان طائر مايزعل

المهم تسبحت وصلت ولبست ولا اشوف اخوي الكبير بالدوانيه بوعذاب واخوى الثاني سنفور غضبان علشان نروح للمرشح بس عشاء اختى الكبيره غيرت وجهتنا قلت نروح نتعشا عندها وبعدها نروح للمرشح توكنا على الله وركبنا سيارة بوعذاب وصلنا البيت ولا ولد أختى خارج المنزل مع كلب الله يعزكم؟؟؟

الولد صاير أمريكي

بوعذاب اطلق صرخه من نافذت سيارته قاعد مع الكلب ياكلب ههههههه انا شفيها يابن الحلال انت ماتعرف قصة الكلب الوفي هذا شنو قصته طبعا ولد أختى نحش داخل البيت ولا سلم علينا من صرخة بوعذاب كلمت ابوعذاب وكملت القصه حقه هذا الكلب كان جرو صغير ضايع بالاصطبل وربوه وجابوه البيت وحطوه منزل له خارج البيت وهو صغير وبعد ماكبر قرر زوج اختى ان يرده للطبيعه ويرده الى موقعه الاصلي وهو البر وبعد ماوداه الى مكان بعيد جدا عاد من جديد بعد يوم كامل من العناء وقرر مره ثانيه زوج اختى ان يعيده الى البر الى موقع ابعد بكيثر عن الموقع السابق وبعد غياب ثلاثة ايام بلياليهم عاد مره اخر هذا الكلب الى المنزل والى اصدقائه ابناء اختى

بوعذاب : بس الكلب يمنع الملائكه من دخول المنزل

انا : يابن الحلال الكلب برا البيت مو داخل البيت انت شايف المنطقه الجديده كلها بنيان الولد يلعب مع منو؟؟؟ يعنى عذر

(:

دخلنا البيت اللى اول مره ندشه انا بوعذاب فقط اما سنفور غضبان عارفه من زمان وهو الدليله اللى دلانه البيت سلمة على اختى وباركنا لها البيت الجديد وسلمت على كتاكيتها وبعد القهوه والشاى والحلوه جت بنت اختى الصغيره ورده عمرها يمكن ثلاث سنوات تقول ثعودي يبكى يعني سعود يبكي

ليش يبكى قلت بقلبي اكيد يبكى من الصرخه المرعب بوعذاب راحت راضيته وجبته وقعد ويانا

يكسر خاطري هذا الولد جدا

يقول حق امه انتي ذبحتيني كل تجيبين بنات انا بروحي ولد فى البيت العب مع منو زهقت من البنات ابي ولد العب معاه

تقولي اختى ان سعود جايب ورقة من المدرسه حق النشاط المدرسي لازم يوقع عليها ولي الامر علشان يدخل النشاط اللى يبيه راح سعود حق ابوه علشان يوقع عليها زفه الله يهداه وقاله تبي تصير دنبكجي ههههه سعود قعد يبكي ام سعود تقول كسر خاطرى ووقعت الورقه من وراء ابوه وقلت له لاتعلم ابوك قال زين تقول بعد اسبوع ولا اسمع صوت طقطقه بالمطبخ ازعاج غير طبيعى رحت ولا سعود ماخذ الجدور ويطبل عليهم ليش حبيبي تسوى جذيه قال يمه انا مشترك فى قسم الموسيقى وتخصصي طبـــــــــل هههههههه تقول جنني وين مايروح يطبل مره على الباب ومره على طبلون السياره ومره على الجدور انا وقعتله ورقت النشاط علشان لازم الولد تصير عنده هوايه بس مدري ان هوايته مزعجه وتطبيل يقاطع سعود امه ويقول خالي انا اللى ادق النشيد الوطنى كل يوم صبح بالطابور

ارد عليه وقوله والله عفيه على الشاطر يتدخل بوعذاب ويقول يعني دنبكجي هههه يابن الحلال خل الولد هذا النشيد الوطني ياخي

تقول اختى عن ولدها سعود يموت على الخيل ويحبها حيل بشكل خيالي حتى لعبة البلاي ستيشن خيل اتذكر انا قبل سألت سعود اذا كبرت شنو تبي تصير قالي جوكي؟؟؟

ماعرفت شنو جوكي اخاف وظيفه جديده وانا مدرى شنو جوكي

قالي خالي اللى يركب فوق الخيل فى السباق

هههههههه ايه تحب الخيل حيل

ايه خالي اموت عليها انشالله اذا كبرت اشترى خيل حلوه واصيله مو جحشه اللى عند ابوى وخايسه ماتفوز كله خسرانه ههههههه بس الخايسه اللى عند ابوك يوم باعها ليش بكيت ؟؟؟

(:

كانت زياره سريعه ولطيفه عند اختى وكتاكيتها وتعشينا وقضينا وقت جميل

واشعر اني مقصر حيــــــــــــــــــل مع شقيقاتي والعايله كلها ودي على يوم نتجمع وناكل من صحن واحد مثل ايام قبل

.

.

.

اما المرشح مايشوف شر طاف

(:

ملاحظه

الطفل اللذي لا ينام لقب اطلقه طائر بلا وطن على ولد أختى سعود

(:

محد يسلم من ألسان طائر ابدا