qalm-jaf

Wednesday, December 12, 2007

نبيـــها بيــــض

.
.
شنو اللي قاعد يصير بالبلد .. الغلاء شلخ مخابينا و الديرة كل مالها بالصاعد
ما يمدي الزيادة تجي من هني إلا و التجار جزر فينا من الصوب الثاني
ياهووو ما جت والله ما جت بعد
العن أبو داركم سعر البيض يرقع دبل .. لا حسيب و لا رقيب
صكني راسي و أنا أقرا الجريدة .. و لا و يقول اللي ما يتسمى 3 دنانير بالمستقبل
مادري هو ضعف ولا تواطؤ من الحكومة .. ولا جشع و طمع من التجار
خافوا الله يا ناس .. دبل عاد .. و الخير بقبال على العيش و الحليب
و الجبن و حتى الزقاير .. يعني فوق الهم تدخن عشان تنسى بعد ملعون خيرك
هم ميت من الزقارة و هم ميت من الهم و هم ميت جوع
و لا .. و انت مشتهي بيض بعد
.
.
على اللي يسوى و اللي ما يسوى سوينا مظاهرات و اعتصامات و شبينا شموع
و كل واحد فينا شال له سراي تقول قاعدين نحتفل بالمولد
نبيها خمس مو عشان البلد؟ مو عشان الشعب؟
شبينا شموع عشان كتاب تم رفض نشره
عشان حرية الرأي مو؟
سوينا اعتصامات بمعرض الكتاب
عشان القمع الفكري اللي حاصل .. أدري
و مصادرة حق الكتّاب و القرّاء صح؟
غرسنا أعلام و كامبينج على البحر و ديجيه
شنو بعد بقى ما سوينا له اعتصام؟
.
إحنا هالمرة نبي ناكل .. نبي نعيش .. ارحمونا شوي
ما نبيها بان كيك .. نبيها بيض .. بوعيون طماط مو مهم
ملح .. فلفل سود .. رمل .. كيفنا عاد
ما نبيها جبنة فرنسية .. دمياطي و يخب علينا
نتنة و بالدود .. عادي .. ما نشوف شر احنا
نبيها عيش ناكله على الغدا .. هونا عن الستيك
حتى لو عيش التموين .. لو عيش مصري تعقد تطحس أمك يصير نثري
ما نبيها تشيليز و لا أبل بيز و لا الشيرتون
مطعم هندي .. انشالله نجمة الجليب و اللي حواليك ياكلون كلهم من ربع .......ا
نبيها حليب لعيالنا .. سيريلاك شعبي .. اللي يصير
نبيها قهوة من دلة محلية .. يغور ستاربكس و ربعه
نبيها تمر محزر و خل التشيز كيك لأهله .. للتشيز كيك
نبي دشداشة نايلون المتر بنص .. نظام البس و قط
ما نبي انجليزي و لا بيجامة .. يعيش الوزار
البودي شوب يولي .. الله يخلي لنا الحواي و الطابوقة السودة
صابونة رقي يتوارثها الأجيال و لا تخلص .. و ممكن استخدامها لأغراض أخرى
تسند فيها الباب مثلا .. ايــــه بيبانا مافيها بريكات
اشحقة غترة دينهيل .. اشحقة شماق كارتير
الله يخلي لنا اليمني اللي مبسط عند باب المستوصف و دلاغات العايلة
نبي نعيش يا ناس
ما نبي بيوت ديلوكس .. و لا شقة بالشعب البحري
نبيها شقة غرفتين و حمامين و مطبخ و صالة
و الصبغ و الصحي علينا
وبالفريج اللي ورانا .. و أجار يرحم شوي يرحم لي والديكم
ايــــــــــه .. و أكيد يعني ويهي مو مال الشويخ و لا عبدالله السالم
كل شي بالصاعد .. العقار يشب ضو
أرض 400 متر جلحة ملحة توصل ميتين و ثلاث مية ألف .. على شنو؟
فيها كنز علاء الدين المفقود .. و لا مجاورة لبحيرة تطب عليها البجع
أقصاها لا صارت و بالشتا .. نقعة معفنة من المطر الجلب الأيرب ما يسبح فيها
.
إجرام والله إجرام .. يعني نبوق؟
عاد قلم شكله حرامي
والله اني قايل له خل نفسر أحلام ولا نسوي مركز اصلاح ذات البين
و حل المشاكل العاطفية و الإجتماعية حالنا حال اللي ترزقو و اللي
مترززين في كل مكان و عايشين على أفى المرضى و الغلابة
و التعابة و التعساء من البشر
كلها كم كلمة و كم جملة و عط الناس على جوها
و أهم شي تخلي كلمة"خيرا رأيت" على لسانك
و يا حبذا مع اللدغة .. تطلع أحلى
لا حول و لا قوة إلا بالله
.
إيــــه نبيها بيض
و خبز و جبن
أدري المظاهرة مو كول و مالت أعيال الفقر .. بس ترى احنا كويتين بعد
ماشاالله علينا صرنا افغانستانيين أكثر من الأفغانستانيين نفسهم
و عراقيين أكثر من العراقيين
و لبنانيين أكثر من أهلها .. عاد كلش لايق على وجيهنا
و أمريكيين تقول كل واحد معلقين سرته فوق تمثال الحرية
و مسلمين أكثر المسلمين
و مسيحيين مسكين عندنا البابا
و صايعين العن من أكبر خربوطي
و متحررين و ليبراليين و علمانيين و دينين و متطرفين
و ستعش الف مليون ملة
و إحنا كلنا خمسة ستة
.
يرحم والديكم نبي بيض بس
حتى اليوم متعشي خبز ايراني و جبن كيري و شاي
و لا .. من غير بيض
أنا قاعد أفكر أسوي حظيرة .. بس المشكلة حتى العلف مو مدعوم
يعني أوكلهم ولا أوكل نفسي و لا الكم بني آدم اللي مبطلين حلوجهم
و لا أبشرو بالأضحية .. ههههههه عاد مادري حزتها
أدفع قسط السيارة و لا أضحي
أتوقع النعية هالعيد بتشفط حق أقدعها لسكز ولا مرسيدس
بس كافي
أحد يشيل هاللاب توب مني أبي أنفجر
.
.
سامحني قلم كتبت عندك .. تدري أنا هوم ليس
أتمشى بالسكيك و أقيل بالبراحة و أنام يم الفرع
كود أحلم في بيض .. أو يتصدق علي واحد الله منعم عليه
مع إن الأشكال اللي عندنا ما توحي .. بأشوف لي فرع بمنطقة فايف ستارز
و أدري أمون .. و حتى لو ما أمون
ما تشوف شر هههههههههه
ايـــــــــــــــــــــــه الله المستعان
تصبحون على بيض
.
.
طائر بلا وطن
بعد ما دار عليه الزمن
هههههه

12 Comments:

  • ياولد كاتب كلمات حضريه فى مدونتي ياولي ويلاه
    كلب اجرب مو ايرب دخت وانا ابى افهمها ههههههههه
    تو ماشفت شي ياطائر خلاص نحن لسنا مرفهين خلاص لازم نفهم ان الكويتين مو مرفهين والبلد صايره غاليه ونار والله يلعن تجار الغلاء اوصخ تاجر العالم تجار الكويت ألعن من اليهود والحكومه اضعف من بيت الشبثه (العنكبون(؟
    الله كريم انا ودى اسوى مظاهرات وكسر كراسى على روس الاعضاء والحكومه والتجار الى مزبلة التاريخ ان شاء الله وعندى لك شي يرفع الضغط اليوم صار بالدوام مقدر اقوله اخاف يسحبونى وسصطرونك انت
    (:
    آه ياقلبي
    الحكومه دافعه حق مليونير مليونير فلوسه ماتخلص دافعين حقه شكلى بتفنش خلاص

    قلم جاف

    By Anonymous Anonymous, at 2:52 AM  

  • استر علينا الله يستر عليك

    اليوم صارت سالفة بعد

    شلخت أم الريال و آخر شي طلع منهم

    أنا ما اعرفك و المدونة مدونتك

    و الكلام كلامك و الصوت صوتك

    و حتى الخشة خشتك

    الشعر ما كان أحسن؟
    البيض قتل احساسي

    By Anonymous طائر بلا وطن, at 3:11 AM  

  • شوف حلي لهل الموضوع :>

    وعطنا رايك

    http://q8disaster.blogspot.com/2007/12/blog-post_4253.html

    By Blogger Q8Disaster, at 5:42 PM  

  • inta kalam 3awar galb mal ana !

    By Anonymous judy abbott, at 10:09 AM  

  • قلم جاف
    ........

    انت مشتت الله يحييك

    مشتت الله يحييك





    كويت ديزآستر
    ..........

    الراي رايك

    زرناك البارحة
    :)

    حياك الله





    جودي أبوت
    .........

    سلامة قلب مال انت

    ما كان يقصد أنا
    :p

    By Anonymous طائر بلا وطن, at 1:06 PM  

  • تبطل تكتب وتصك مدونتك فهمناها

    بس لما تتي تكتب تكتب هنيه

    وعن البيض؟؟؟؟

    ليش معك نقص بروتين

    شالسالفه

    ما عجبنى البوست

    تحلطم في تحلطم

    وانا ما احب التحلطم

    By Blogger ZoZOta, at 6:43 AM  

  • عندما تضيق بنا الدروب
    لا تتسع لنا إلا صدور الأصدقاء

    و عندما تنفينا الحياة
    فقلوبهم لنا وطن

    هنا أو في مدونتي

    لا أجد و لا أشعر بمثقال ذرة من فرق

    :
    :

    نعم

    ينقصني البروتين
    :)

    و أكثر

    و هناك ما زاد سعره بالقدر البسيط

    و هناك ما ارتفع بالكثير



    و هناك ما بعد و تجاوز حد المحال

    و تمضي الحياة

    و نمضي

    و تطوى الصفحات

    و ابتسامات تغتسل بالدموع

    أملاً في أمل
    !!

    :


    هل لي أن أعتذر لأنه لم يعجبك؟
    :)

    تستاهلين

    خلاص راح أحن و اتحلطم على الجدران
    :p

    كل عام و انتي بخير يا الزين
    و عموم اسرتك الكريمة

    By Blogger طائر بلا وطن, at 5:21 PM  

  • طائر..بس الي ابي افهمة ليش تسكرت مدونتك ليش يعني؟؟؟
    الجماهير الي تحبك مالها حق عليك يعني..ههههه

    نطالب برجوع مدونة طائر بلا وطن ولا راح نسوي اعتصام ومظاهرة عن مدونتك وعن البيض بعد مرة وحدة ههههههه


    كل عام وانت وقلم وضحى الصغيرونه وكل من تحب بخير يارب

    واتمنى انك تتراجع عن قرارك وترد تفتح المدونة..يا لييت

    تحياتي

    أم ريان

    أدري ابتلشت فني لاحقتك وين ما ترووح:P lool

    By Anonymous Anonymous, at 4:42 PM  

  • أهلا أهلا

    يا صباح الخير

    ألم أقل إنك لا تتوهين عن دروب الوصال
    :)


    خلاص .. بطلنا نحب
    :p

    و كبرنا و شيّبنا و سكربنا



    مشكورة وايد يا أم ريان
    ولا تتعبين حالك من المظاهرات

    و إذا نزل سعر البيض أبي أرجع
    هههههه




    كل عام و انتي بخير يا رب
    و عموم أهلك و أحبابك


    لا بالعكس يا أم ريان

    انتي وحدة من ناس قليلة جدا اسألت
    و ما تدرين اشكثر يعني لي هالشي

    مشكورة واااايد

    By Blogger طائر بلا وطن, at 11:31 PM  

  • السلام عليكم

    شكو شيبنا وكبرنا..توك شباب وبعدين اللي يكبر ويشيب ويسكرب على قولتك يصير هوم لس ويروح يكتب بمدونات غيره

    تصدق اني انا الي حاسة نفسي هوم لس بدون مدونتك و كل يومين امر على مدونتك اقوول عل وعسى ..يمكن الله هداك ورجعت المدونة..لكني أرجع بخفي حني وانقمت وبعدها اسكر النت كله
    :(


    يريضك يا طائر..خو ما يصير جذي خلها مفنوحة ولا تكتب الا اذا حنيت للكتابة..على الأقل ما تصير هوم لس واحنا بعد هم ما نصير هوم لس..نقرا قديمك على الأقل..

    ادري تحلطمت وايد وشرهت عليك وايد
    لووووول

    بس هذا كله من معزتك ترا

    بس راح يظل عندي امل انك ترد تحلق في سماء التدوين وتمتعنا

    مع خالص التقدير لك

    أم ريان

    By Anonymous Anonymous, at 10:07 AM  

  • إنشالله خير يا أم ريان و هذا إحنا موجودين

    إشرايك أدخلك المدونة و أقفل عليك
    و خلّي ريّان تدور عليك عاد هههه

    يشهد الله إنك عزيزة و غالية

    و لا أثقل على قلبي من إني أرد أحد

    الله كريم
    :)

    و دام مدونة قلم موجودة إنشالله مافينا الهوم لس

    و مكانك ما تشيله مدونة يا أم ريان



    تمونين أكيد

    أنا اللي مشكور لك
    وايد بعد
    :)

    By Blogger طائر بلا وطن, at 2:11 PM  

  • By Blogger codecx, at 8:20 AM  

Post a Comment

<< Home