العيديه والاشتراكيه؟

العيد اللى ما اقدر انساه عندما كنت فى الابتدائيه يمكن او الاول المتوسط كان المصروف المدرسى ربع دينار وهو مبلغ له احترام وتقدير اما مصروف المساء كتكات وعصير سانكست اتذكر طقوس قبل العيد دشداشه جديده وملابس داخليه ونعال اعزكم الله حاطهم جنب المخده ونايم بدرى وكل شوى قاعد اشيك على الاغراض اذا فى شي ناقص منهم او فى احد من اخوانى سرقهم الى ان تصل الساعه الرابعه فجرا اخذ شور العيد شور العيد له طعم ثانى تشعر وكأنك اول مره تتسبح وتلبس ملابس العيد جديد فى جديد وتحس انك ولد نعمه ابيض فى ابيض جنك دعاية تايد مع مبيض نروح المسجد مع الوالد ونردد مثل مايقولون الكبار
الله اكبر الله واكبر الله واكبر ولله الحمد الحمدالله كثيرا وسبحان الله بكرتا واصيلا
الله واكبر الله واكبر
كان لها اثر فى نفسي وشيء جميل واحساس رائع وعيال الشارع كلهم ابيض فى ابيض الى ادرجة ان مانعرف بعض ماشالله من كثر البياض الساطع والالوان الخلابه اكيد الشامبو عامل عمايل فى تسريحات الشعر اللى بس هى حركه وحده التمشيط على جنب مافى غير التسريحه بس كان الاختيار اما على الجنب الايمن او الايسر نصلي ونسمع الخطبه وبعدين ندور نعولنا الله يعزكم اللى حظه معفن انسرقت انعاله واللى حظه زين يلقاهم يحمد ربه ستين مره واحيانا تشوف عليه دموع الفرح لانها ماركات عالميه مثل تميمه وتيربو ونجديه تطرييز بعد الخروج من المسجد ندور الشياب وننطرهم اما فى الساحه الترابيه او نفتر على البيوت بوسه وعيدك امبارك عمي ونعطيهم نظرت البراءه بس ماكو فايده
اتذكر جارنا الله يرحمه عطانى عيديه ميه وخمسه وعشرين فلس
الله يرحمك يابومسير لو معطينى ميه ابرك الخمسه وعشرين فلس اشحقه اما ابوى لايعرف الا لغة الربع دينار عيد الاضحى او عيد الهيلوين الله يخليه لنا يارب اجتمعنا نحن اطفال الشارع كله ارباع نسأل بعض جم جمعة هذا دينارين وهذا ثلاثة بس كله ارباع بستثناء الخرده حقت ابو مسير الله يرحمه نبى نصف دينار اى شي نبى نشوف شكلها يمكن
نسمع خبر ان ابو فلان المشهور بالضابط انه يعطى نصف دينار ليش لانه رجل معروف وضابظ فى الدوله له مكانته ويحترم رجال المستقبل رحنا ركظ على بيتهم وطحنا عليه بوس خشمه وراسه واذنه لو تشوفنا من بعيد واحنا نبوسه على بالك ياسر عرفات يبوس الملك فهد الله يرحم الاخير فقط
يقولنا الضابط راح اعطيك نصف دينار بس على شرط عطنى ربع واخذ نص يعنى قص علينا وعطانا ربع بس احنا مافهمنا الحركه كنا كتاكيت والبراءه تشع من ملابسنا البيضاء الله يسامحه على الحركه طلع ضابط ايقاع نرجع البيت الساعه تسعه تعبانين بس لازال الامل قائم فى تجميع اكثر عدد من الارباع او رؤية غيرها نطلع مع ابوى وامى والعايله كلها نروح بيت عمى عبدالله الله يرحمه اسلم واقعد بجانب ابى يعنى مؤدب وحياوى وعيونى فى الارض انطر احد يعطينى عيديه اذا عطونى اقول لا مابى واطالع ابوى الين يقولى اخذ العيديه اليوم عيد
بس عندما ناداني عمى وعطانى عيديه عشرة دنانير خضراء كانت الصدمه وبغى يغمى علي وما نطرت الاذن من ابوى على طول حطيتها في مخباتى وكان ودى اقول حق ابوى بسرعه نرجع البيت اخاف عمى يرجع فى كلامه بعد ماوصلت البيت اخوى اللى اصغر منى قال حق اخوى الكبير وخواتى وشتغلت الفتنه تجمعوا على يبون يخاذون العشره دنانير منى وبعض خواتى كانو يبون يشوفون شكلها بس فضول وانا ماسك العشرة ونايم على بطنى وابجي واخوى يقول عطنيها لا اكسر وجهك وصل الوالد وعطانا حركه بهلونيه بالعقال كلنا واخذ العشره منى وبدأ بالمحاكمه بأن توزع العشره على الكل على ما اعتقد الوالد كان فى توزيع المصروف والطق والعقال يتبع المدرسه الاشتراكيه
.وهذي اول وآخر عيديه بعشرة دنانير ورجعنا الى عالم الربع دينار والعصير السانكست والكت كات
.
.(:
-------------------------------------------------------------------------------------------
اتمنى ما تنسون الاطفال من العيديه ولاتنسون الخدامه والسايق خلوا الكل يستانس حتى الخدم وياليت بنات هالوقت ياساعدونهم وخصوصا بالعيد الشغل كثير والكلمه الطيبه بركه والابتسامه حسنه وهذى ابتسامه لكم
(:

.
.
.
عيدكم مبارك وكل عام وانتم جميعا بألف خير وصحه
آمييييييييين
.
.
اهداء لكم او اعتبروها عيديه
.
.
.
سليت سيفي وذبحت الشمس لعيونك
وما جا في بالي تجي شمسك وتذبحني